မလေးရှားရောက် ရခိုင်လူမျိုးများရေး UNHCRရုံးရှေ့တွင် တောင်းဆိုခဲ့ကြ

မိုးမိုးကျော်

ဇွန်(၇)၊ ၂၀၁၀။

လူမျိုးရေး ခွဲခြားဆက်ဆံခြင်းများ မပြုလုပ်ရန်နှင့် ဒုက္ခသည်အဖြစ် အသိအမှတ်ပြုပေးရန် (UNHCR) အား မလေးရှားရှိ ရခိုင်လူမျိုးများက ဆန္ဒပြ တောင်းဆိုနေကြစဉ်

မလေးရှားနိုင်ငံ၊ ကွာလာလမ်ပူမြို့ရှိ ကမ္ဘာ့ကုလသမဂ္ဂ ဒုက္ခသည်များ ဆိုင်ရာ မဟာမင်းကြီးရုံး (UNHCR) ရှေ့တွင် ယနေ့ ဇွန်လ (၇) ရက်နေ့ နံနက်ပိုင်းက မလေးရှားနိုင်ငံသို့ ရောက်ရှိနေကြသော ရခိုင်လူမျိုး (၇၀) ကျော်ခန့်က ငြိမ်းချမ်းစွာ ဆန္ဒပြ တောင်းဆိုမှု တခု ပြုလုပ်ခဲ့ကြကြောင်း သိရှိရသည်။

ရခိုင်လူမျိုးများအပေါ် ခွဲခြား ဆက်ဆံမှုများအား ရပ်တန့်စေရန် ကမ္ဘာ့ကုလသမဂ္ဂ ဒုက္ခသည်များ ဆိုင်ရာ မဟာမင်းကြီးရုံး (UNHCR) အား တောင်းဆို ဆန္ဒပြခဲ့ကြခြင်းဖြစ်ကြောင်း ဆန္ဒပြရာတွင် အဓိက ပါဝင် လှုပ်ရှားခဲ့သူ တဦးဖြစ်သည့် ကိုမင်းမင်းထွန်းက Arakan Review သို့ ပြောသည်။

“ဒီမှာ ရှိနေကြတဲ့ ရခိုင်လူမျိုးတွေကို (UNHCR) က ဒုက္ခသည် အဖြစ် အသိအမှတ် မပြုပေးဘူး၊ ကျနော်တို့ ဒီမှာ နေရတဲ့ အခြေအနေက ဘ၀အတွက် လုံးဝ လုံခြုံမှု မရှိသလို ဖြစ်နေတယ်။ ပြသနာ တစုံတရာ ဖြစ်လာရင် လည်း စောင့်ရှောက် ကူညီပေးမှု မရှိဘူး။ တခြား လူမျိုးတွေ အပေါ် (UNHCR) က ဆက်ဆံတာတွေနဲ့ ကျနော်တို့ ရခိုင် လူမျိုး တွေ အပေါ် ဆက်ဆံတာ လုံးဝ ခြားနား နေတယ်။ အဲဒါ ဘာကြောင့်လဲ စဉ်းစားလို့ကို မရဘူး။ ဒါကြောင့် (UNHCR) ကို ကျနော်တို့ ဒီနေ့မှာ တောင်းဆို ခဲ့တယ်။ လူမျိုးရေး ခွဲခြား ဆက်ဆံမှု တွေ မပြုလုပ်ကြဖို့ အတွက်ပေါ့၊ ပြီးတော့ ကျနော်တို့ မလေးရှားမှာ ရောက်ရှိနေကြတဲ့ ရခိုင်လူမျိုး ဒုက္ခ သည်တွေကို တရားဝင် ဒုက္ခသည် အဖြစ် အသိအမှတ် ပေးဖို့ တောင်းဆို ဆန္ဒပြခဲ့ ကြတာပါ” ဟု သူက ပြောသည်။

မလေးရှား နိုင်ငံတွင် ရခိုင်လူမျိုး ဒုက္ခသည် (၁၀၀၀၀) ကျော် ခန့် ရှိကြောင်း အဆိုပါ ရခိုင် လူမျိုးများအား ကမ္ဘာ့ ကုလသမဂ္ဂ ဒုက္ခသည်များ ဆိုင်ရာ မဟာမင်းကြီးရုံး (UNHCR) မှ ဒုက္ခသည် အဖြစ် တရားဝင် အသိအမှတ် မပြုဘဲ ဒုက္ခသည် အစစ်အမှန် မဟုတ်ဟု စွပ်စွဲ ထားကာ ယင်း ဒုက္ခသည် ရခိုင် လူမျိုးတို့အား အကာအကွယ် ပေးမှု လုံးဝ မရှိ ကြောင်း သိရှိရသည်။

ဆန္ဒပြ တောင်းဆို ရာတွင် “ မလေးရှားရောက် ရခိုင် ဒုက္ခသည် များအား (UNHCR) မှ အသိအမှတ် ပြုပြီး ကူညီ စောင့်ရှောက်ရန်၊ မလေးရှားရှိ ထောင်နှင့် ဒုက္ခသည် စခန်းများတွင် ထိန်းသိမ်း ခံထားရသော ရခိုင် ဒုက္ခသည်များအား (UNHCR) မှ သွားရောက် ကူညီ ဖြေရှင်း ပေးရန်နှင့် (UNHCR) ရုံးတွင် ရခိုင် ဘာသာပြန် ထားရှိရန်” စသည့် အချက် သုံးချက်ကို အဓိက တောင်းဆို ဆန္ဒပြခဲ့ ကြကြောင်း သိရှိရသည်။

ကွာလာ လမ်ပူမြို့ရှိ (UNHCR) ရုံးရှေ့တွင် ဆန္ဒပြ တောင်းဆို နေစဉ်တွင် မလေးရှားနိုင်ငံရှိ လုံခြုံရေး ရဲများက ဆန္ဒပြ အုပ်စုများ၏ အနီးအနားတွင် နေရာ ယူကာ စောင့်ကြည့် နေခဲ့ကြကြောင်း သိရသည်။

အဆိုပါ တောင်းဆိုချက် သုံးချက်အား (UNHCR) ရုံးမှ တာဝန် ရှိသူ တဦးက စဉ်းစားပေးမည်ဟု ပြောကြားခဲ့ ကြောင်း ကိုမင်းမင်းထွန်းက ဆက်လက် ပြောသည်။

“ကျနော်တို့ ဆန္ဒပြလို့ ခဏအကြာမှာ (UNHCR) ရုံးက တာဝန် ရှိတဲ့သူ တဦး ထွက်လာပြီး ကျနော်တို့ တောင်းဆို ချက် တွေနဲ့ ပတ်သက်လို့ စဉ်းစား ပေးမယ်လို့ ပြောတယ်၊ သူ ပြောတာကို ကျနော် ယုံတယ်။ မလေးရှားမှာ ရှိနေတဲ့ ရခိုင်လူမျိုး ဒုက္ခသည် (၁၀၀၀၀) ကျော် အတွက် သူတို့ တခုခု စီစဉ် ပေးလာလိမ့်မယ် ဆိုတာ။ တကယ်လို့ အဲဒီ တောင်းဆို ချက်တွေ အပေါ်မှာ ဘာတခုမှ လိုက်လျော ပေးတာမရှိဘူး၊ ဆောင်ရွက် ပေးတာ မရှိခဲ့ဘူး ဆိုရင်တော့ ကျနော်တို့ ထပ်ပြီး တောင်းဆို သွားမယ်” ဟု သူက ပြောသည်။

ရခိုင် လူမျိုးများသည် မြန်မာနိုင်ငံတွင် စစ်အာဏာရှင် များ၏ မတရားသော အုပ်ချုပ်မှု စနစ်များကြောင့် အိမ်နီးချင်း နိုင်ငံများ ဖြစ်ကြသည့် ထိုင်း၊ မလေးရှား စသည့် နိုင်ငံများသို့ ထွက်ပြေး တိမ်းရှောင် နေကြရကြောင်း၊ ယင်းသို့ ထွက်ပြေး တိမ်းရှောင် နေကြရသော ရခိုင် လူမျိုးများသည် မြန်မာနိုင်ငံတွင် ခွဲခြား ဆက်ဆံခံရသည် သာမကပဲ ယခုကဲ့သို့ ကမ္ဘာ့ကုလ သမဂ္ဂ ဒုက္ခသည်များ ဆိုင်ရာ မဟာမင်းကြီးရုံး (UNHCR) ၏ ခွဲခြား ဆက်ဆံမှုကိုပါ တဆက်တည်း ခံစား နေရသည့် အတွက် ကြောင့် (UNHCR) ၏ ရခိုင် လူမျိုးများ အပေါ် ခွဲခြား ဆက်ဆံ ရသည့် အဓိက အကြောင်း အရင်းအား မည်သည် အတွက်ကြောင့် ဆိုသည်ကို ဆက်စပ်၍ မရနိုင် လောက်အောင် ဖြစ်ရသည်ဟု ရခိုင်လူမျိုး အများစုက ဝေဖန် သုံးသပ် နေကြသည်ဟု သိရှိရသည်။